Tun hnai mai atang khan software piracy leh sorkarina computer a lei dan chungchangah chanchinbu kaltlanga inhnialna ka lo hmu ve nual a. Computer-ah chauh ni lo, piracy chungchang hrim hrimah Zoram mipuite kan harh chhuak ve tan ta niin ka hria. A chhan niawma lang pawh kan ram chhuak - zaithiamte leh film siamtute cassette/disc ngei mai, an Mizopuite bawkin an phalna la hmasa lova sumdawnna atan an lo hman vang ni te paw’n a sawi theih ang. Hmanni lawk khan Mizoram Film & Music Producer Guild (MF&MPG) chu din a ni a. He pawl hian mipuite hnenah piracy leh a kaihhnawih thilah leh sorkarin piracy chungchanga thil a tih theihte chungchangah awareness min pek ngei beisei ila.
Mahni ngaihdan kan sawi chhuak theuh hlawm bawk a, khaw'nge ka hriat ve china ka ngaihdan kan sawi chhuak ve reng reng teh ang.
Kan ramah hian computer-ah chauh ni lo, music leh film leh thil tinreng deuh thawah hian piracy leh imitation hmel hmuh tur a awm. Film leh zai, India ram khawpui lian deuh deuh (metros)-ah pawh release a nih hma hauhin Aizawla cassette zawrhna dawr tam takah chuan a disc leh cassette lei theih leh hawh theihin a lo awm hman vek zel a (A fiah vak lo mai pawh a). Film chhuak thar tam tak han en hian a pirate-tute’n an lakna, source an duhtui lohzia a hriat theih (an copy-na original source chu thu hran ni se), mi lu leh mihring kal lai (a film-a mi ni miah si lo) lo lang zuk zuk thin hian khawi ram (foreign) emawa cinema hall-ah a entu, tu emawin camcorder-in a lo la ru thin tih a hriat theih mai a. Hetianga disc/cassette quality lo lutuk kan en fo chuan movie en leh music ngaihthlak tinuam zualtu tur, digital effects hrang hrang - Dolby Digital, DTS, THX te leh multi-sorround sound system (5.1, 6.1, 7.1) hrang hrangte hi mi tam zawk chuan kan experience-a kan enjoy theih a rinawm loh. Hei vang hian DVD/VCD players, AV receivers leh home theatre speakers original tha tak tak leh man to tak tak neite tan pawh neih man a awm loh phah viau thei.
Computer chungchang sawi dawn ta ila. Branded leh (locally) assembled computer-te hi eng nge an danglamna le? Keia ngaih ve danah chuan danglamna teh chiam a awm lo. An danglamna ber chu assembled chu branded aiin a tlawm fe zawk tih hi a ni mai. Branded a nih vang khan a that bikna tur ka hre lo. Branded computers (HP, IBM, Dell, HCL, Zenith, Compaq etc.) te pawh hi a siamtu company theuhte’na an assembled ve tho a ni. A chhan chu an computer siam nan khan company hrang hrang siam components an hmang ve tho. Khawi branded computer mah a siamtu company kutchhuak hlang hlak a awm ka ring lo. Chuvangin, company pakhatin a assembled kha an company hming leh logo te a chuantir khan branded a lo ni ta mai a ni. Entir nan, kan rama computer dealer hlun ber pawl, Sunflower Electronics hian an customer-te tan computer a assembled-in a case pawn lamah an logo (chhinchhiahna) SELZ tih a bel thin a, IBM branded computer ni lovin SELZ computer a lo ni ta mai a ni. Chuvangin, phai atanga ‘branded’ computers i lei chuan pawisa i seng thlawn mai maiah kei chuan ka ngai. A aiah kan Mizopuite 'kutchhuak’ ngei, locally assembled, free (one year) after sales service nen lehnghal lei la, i tihfuh zawk ka ring. Bakah heng 'branded' computers kan tih siamchhuaktu company-te tan hian an advertisement expenses (tam tak tak) kan peksak mai mai a ni zawk lo maw?
Tin, piracy chungchang kan sawi hian original version leh pirated version anga sawi vak chi niin ka ngai lo. 'Original' leh 'version' nilovin, licensed software emaw pirated software tiin sawi zawk ila a dik ka ring. A chhan chu software/program-te hian original version leh pirated version an nei hrangin ka hre lo. A program hrim hrima kha (a source code a awm a, a develop-tute phalna la lovin) tihdanglam (altered) a nih loh chuan original a ni reng mai zawk lo'm ni? Entir nan, analog ang loin digital-ah chuan a tir/hmasa ber (original) kha eng anga tam pawh siamchhuak/chhawng (replicate, duplicate nilovin) mah ila, a quality a hloh theih vak chuang loh. Tape cassette (analog) original i record (dub) chuan i dubbed cassette kha chu a original ai kha chuan a fiah lo/ring lo zawk daih ang. Mahse, CD/Compact Disc (digital) thung erawh chu eng anga tam pawh write-in copy mah la, a sound quality-ah danglamna a awm em em lo ang (i CD hman quality a zir ni tho mah se). Computer-ah pawh a version zawng - original leh pirated zawnga sawi hi chu a inhmeh lem lo.Tin, kan sorkarin computer lei tur a thlan danah pawh hian a ti fuh vak lovin ka hria, a ram mite duhsak tura beisei a nih lai leh kan Mizopuite ngei tan hlawkna a siam theih laiin. Heti hi chuan Mizo, thiam taka inzir chhuakte 'kutchhuak' a ring zo lo ni te paw'n a ngaih theih mai dawn. C.A.I. ho an vui pawh hi awm ka tihpui hliah hliah. Sum an duh vang pawh a ni thei ang, a pawi lo. Sumdawng, hlawkna um an ni miau alawm! Mahse, economically-a an hlawk chuan social leh political zawng pawhin mipui leh sorkar hian kan hlawkpuina lai a awm ve leh tho ang, business chu social, political leh factor dangte nena interdependent leh interrelated vek a nih avangin, amah chauhvin a survive thei lo tih pawh kan hriat theuh ka ring.A thu hrimin, piracy (software bik) chungchang hi chu mipui vantlangina inhnialpui vak vakna chi niin ka hre lo. A company concerned-te'n an hloh pawi theih em avang erawh chuan an kutah dah ta zawk mai ila. Chuti lo, tuna kan software hman lar tam tak OS Windows XP-te, office suite MS-Office XP-te leh page layout designing software PageMaker-te hi kan local dealer-te'n a thlawna min install-sak theih laiin, Rs. 12,400, Rs. 19,250 leh Rs. 26,500 tih vel, man to tak taka kan lei a ngaih phah zawk ang. Tin, kan local dealer-te hian original software CD's kha an write/copy-in min pe lem lo a, system pakhata hman theih turin min thun (install)-sak mai a. An computer leisaktute tan a copy/duplicate ve theih tawh chuang lem loh. Software piracy chungchang kan sawi punlun vak vak chuan a siamtu company-te beng a thlen hun a la awm ngei ang. Chutih hunah chuan a hardware man atana Rs. 25,000 (velin lo chhut ta ila) kan pek aiin a aia tam fe, Rs. 50,000 vel (licensed softwares panga tal lei dawn ta ila, Rs. 10,000 theuh pawh ni se: Rs.10,000x5) softwares man atan kan sen a ngai dawn a ni. Chutiang a nih chuan computer lei thei tun ai hian kan tlem phah ngei a rinawm. A zuartute tan pawh demand/market scope a tlem phah hle ang. Bakah, computer penetration leh IT-te pawh hi (tun ang hian) a sangin a darhzauvin hma a sawn theih loh phah ang.
Amaherawhchu, hetianga ka ziah lai hian, local piracy - kan Mizo zaithiamte leh film siamtute - bik hi chu an Mizopuite ngei tan chuan tih loh hram a tha. Kan la te lutuk, nasa takin kan tlakchhiat phah theihin kan than tur ang paw'n min tithang lo thei. Chuvangin, kei chuan, "Go on, NGTV!" ka ti zel dawn. Heng MNC lian, Microsoft Corporation, Bill Gates, 'lal-khawvela-huasaber-a' company, ang te hi chu an pui tiah tiah em! Kan ram zimte-a piracy vang hian a tlukchhiat mai a rinawm loh. An pu pui roh hian kan ramin developmental resources kan nei that lohzia leh information technology-te hi kan thalai tam takte dinchhuah theihna kawng khat a ni tih te min hriatpui se lang chuan a thlawn mai pawh ni loin, sum tam taka min tanpuite pawh a duh hial zawk mai thei asin! State thenkhatte tih ang deuhin kan CM hian kan ram tlawh turte hian han sawm ve nghe nghe se, a tha phian ang; a sawm hlawhtling ve mial mai thei asin!Chuvangin, software piracy chungchang kher hi chu a Sap tawng takin, "We are taking a big deal over a 'small' (small ni lovin, i ti-'small' mai ang) issue," ka ti ta tawp!
Tuna kan kal dan pangngai ang hian kal mawp mawp rih mai ila kan that tlanpui berin ka ring.
