COVID-19: Tuna Kan Test Neih Dan Hian India Ram Dinhmun Dik Tak A Hril Pha Meuh Em?

WHO lam chuan test nasa zawka nei turin ramte a chah a, "Test, test and test,' a ti nawn awn awn.

Test zau zawka kalpui leh kalpui loh chungchangah hian India thuneitute leh WHO lam hotute ngaihdan a inpersan viau. WHO lam chuan India chu test nasa zawka kalpui tura an duh laiin, India-a he natna hrik testing lama authority sang ber ICMR (Indian Council of Medical Research) hotute ve thung chuan India hi tunah hian Stage 2: Local Transmission ah kan la awm mek avangin symptom neia inngai apiangte test chu la ṭul rih lohah a ngai a ni. (Stage 2: Local Transmission chu a kai chhawntu chhui theih stage)

An sawi zel danah chuan India hian test kit tunah hian a nei tam tawk lo a. Chuvangin, a inringhlel nazawng, a lenna rama zin chhuak (travel history nei) ni si lo te, an test nghal vek ngawt chuan a ṭul tak tak hunah test na hmanrua indaih lohna a awm thei maiin an ring a. Sawi dan dang ve thungah chuan India hian ni tin test 8,000 vel nei thei turin capacity a nei chungin, ni khatah test 90 vel lek lek a nei rih a ni awm e. Chuvangin, tuna a testing capacity neih sa ringawt pawh hi a hma ṭangkai pha lo (unutilized) hleah an ngai a ni.

IMCR hotute ṭan chhan pakhatah chuan India hi ram dangte angin Stage 3: Community Transmission em pawh a la kai lo va; chuvângin, WHO hian kaihhruaina a siamin ramte hrut rual vek lovin ram tihbik neiin a siam zawk tur a ni, an ti. (Stage 3: Community Transmission chu a kaichhawntu ber pawh inhriat hleih tawh loha khawtlangin an inkaidarh stage)

Stage hi IMCR hotute hian an changchawi leh lutuk a, stage ringawt buaipuiah mi ṭhenkhat chuan an puh 🙂

Stage 3: Community Transmission-ah khian let leh lawk ila. ICMR hian a khat tawkin Stage 3-ah hian kan thleng tawh nge tawh lo hriat theih nan ramdom samples, India ram damdawi in hrang hranga ICU-a respiratory diseases, pneumonia ang chi vanga awm mekte aṭangin a la khâwm thin a. Hemi aṭang hi chuan tun thlengin COVID-19 hi hmuh chhuah a la ni chuang lo. Mahse, samples hi 500 vel chauh a nih ṭhin avangjn hei pawh hian kan dinhmun dik tak hril pha lo hleah an ngai.

Tichuan, test uar tura India duhpuitute chuan tunah chuan mahni inringhlel nazawng test an phal bawk si lo a, symptom nei zingah pawh a affect nasat rama travel history neite leh chu'ngho hnimhnai (close contact)-tute chauh an la test rih avang hian hei aia tam daih hian kan vei tawhin an ring a ni. US-in ama tana a inchhutsak ang chiahin, India ramah pawh hian, he natna la na lem lo (mild case)-tu chu a tam zawk an ni tho ang a, mipui zaa 60 velin kan inkai darh turah India chu an ngai a ni. US pawh hi test nei uar tawk lo a ngaih a ni.

Test kalpui ṭhaho, Iran leh South Korea te angah chuan rin aiin a darh chak loh phah, an ti a. Test loh chuan tu nge midangte kaichawng thei a inhriat theih miau loh avangin test tam lua a awm thei lo an ni, an ti. ICMR report thar ber (21- March 2020 10:00 AM IST-a mi)-in a tarlan dan: mi 14,811 aṭanga sample 15,701 lak tawhah mi 271 confirmed positive case tih hi chu a beitham leh lutuk a, kan dinhmun dik tak hi hriat ngaihna a awm lo hrim hrim.

COVID-19: Khuanu Rorel Dan Hi

Mihring hi Pathian thil siam zinga mahni mamawh bakah, châk zâwng zawng kual nasa ber, hnianghnar ber leh khawvel leilung hausakna (resource) chên nasa bertu kan ni a. He khawvel mihring 7+ billion-te zinga mi ṭhenkhat chu neih chuangliam piah lama châk zâwng zawnga khawvel khawi hmun pawh fang kual thei an nih laiin, mi dang tam tak chu mahni khamkhawp chu sawi loh, taksain protein minimum-a a mamawh tur tak ngial pawh hmu pha lo kan ni thung. Heng kan mamawh leh châk zawng kan zawnna lamah hian thing leh mau, ramngaw ṭha te kan ṭhiat darh a, ramsa zingah ei duh loh pawh kan neih tak tak loh avângin an awmna kan sawn, kan khawi, kan vulh, kan veh thul. Chutiangah chuan natna hrik, ran leh ran inkar chauha kai chhawn theih tura kan ngaihte khan an awmna (host) chu thlâkin mihringah an rawn insawn ta ṭhin a ni. Hrilêng kan lo hriat tawhho  - Ebola, bird flu, MERS, SARS, Zika virus, Nipah virus leh a dangte pawh hi ran aṭanga mihringin kan kai vek an ni.

Environment/ecology kan tihchhiat vânga he khawvela Pathian thil siam hrang hrangte zinga thil in-balance loh phah ta lutuk chu khuanu (nature) hian siam ṭhat a, ngaiawhtîr (restore) a tumna atân pathogen (virus etc.)-te hi hmanrua-ah a hmang ṭhin dawn a nih hmel. Bible-a hrilêng chungchâng tarlante nen pawh hian a inmil hmel fû mai.

Tunah pawh novel coronavirus leh a natna COVID-19 vângin khawvel a buai a. Hetiang taka khawvel a changkan tawh hnu leh mihringin thiamna leh theihna te kan nei tawh chung hian khawvel pum chawkbuai mêktu hi ralthuam changkâng lam pawh a ni lo, nature aṭang thoa chhuak, mit lâwng pawha hmuh theih loh natna hrik têtaktê a ni lawi si tlat.

Khawvel mihring zatve dâwn chu tûnah hian kan inkharkhip mek a. Thil siam chhuah a tâwp, hman chhuahna a tlem phah, kan chawl ṭhuâp. Hei vang hian inkharkhip khawpuite chu an boruak thianghlim ber lai a ni chho ṭan mêk. Nungchâ leh chunglêng savâ te pawh mihring laka inventhâwn ngai lovin an lêng ve thei ṭan ta, an ti.

Hei erawh hi hria ila. Tuna hripui lêng mêk hi khuanu warning a ni tih nachâng kan hriat loh a, a rêm hunah pawh kan environment ngaihtuah tel nachâng hre lo bawka he khawvel hian hna kan chhunzawm leh tho a nih vaih chuan tun aia hri hlauhawm zâwk tâwn darh tur hi ramngaw chhungah hian an la inphûm ru ṭûn lo ang tih a sawi theih miah loh a nia. Nature bawk hi bio-terrorist tawrawt ber a ni (thei) tih hi hre reng ila. Ram hruaitu ṭhenkhatin an economy ṭhang muang (slowdown) tur pumpelh nana an upate chân ṭhen zawk mai pawh pawi an lo ti lo a nih hlauh phei chuan boruak thianghlim (clean air) te hian chance eng tin nge a neih theih tak ang le?

Thalai Chhawr Tlak: Part 1

Tunah chuan thalai lehkha thiam, hna thawk lem si lo kan tam tawh hle. India Danpui phei chuan kum 14 chin chu hna rum leh rim chi tih loah phei chuan chhawr tan min phal nghal der a. Hna kan hmuh loh leh kan thawh loh chhan chu hna a van tawh vang leh thil dang sawi tur chu awm thei bawk mah se, thalai chhawr tlak leh hman tlak (employable youth) kan ni tawk lo tihna te pawh a lo ni reng thei a. Chhawr tlak ni tur chuan eng nge hriat ngai a, tih ngai ta le?

Hriatna

Hriat hnem chu thiam hnem tihna tluk a ni. Zirlai kan nih lai atangin kan zirlai lehkhabu piah lamah thil dang rintlak chhiar hnem a, hriat hnem hian hna thawk rual, ei zawng rual kan nih hunah kan hnathawhna tak takah min pui thui thei hle. Kan zirlai exam pawimawh chin leh hna dilna-a mark hmuh san te (tihpuitu neih that te pawh a tel thei ang) chu a pawimawh tih chiang sa a ni. Mahse, kan tlinga hna kan han luhchilh tak tak a, mahnia ei zawng pawhin hna kan han thawh tak tak meuh chuan kan zirlai chhunga mi ai mahin pawna lama kan lo inchhiar zau thinna te chu a tangkai zawk duh viau mai. Tunlaiah chuan lehkhabu tak chhiar kher lo pawhin kan smartphone-ah ringawt pawh hian Google news leh feed chi hrang hrang hmeh chhuah mai theihin chhiar sen loh a inchhawp sa teuh a. Jio sim card chauh hman pawhin an JioNews app-ah hian national leh international newspaper leh magazine, category hrang hranga mi, lei hranpa ngai tawh chuang lovin eng tik lai pawhin chhiar tur a kuh tun reng a ni.

Tunlaia Mizote’n kan social media hman lar tak Facebook leh WhatsApp te hi mi tam tak chuan kan hriatna hnar (source) berah hmangin, heng chauh hi innghah nan tak kan hmang ta mai \hin emaw tih tur a ni a. Thu dik leh rintlak tam tak intawm (share) thin ni bawk mah se, belhchian dawl lo leh dawt thuthang thehdarhte a inzep ve reng thin tho avang hian source bera neih chu a fuh lo hle. Heng social media-te hi chu a aia rintlak zawk kan lo chhiar tawh, kan hriat sate leh chumi atanga ngaihdan kan lo siam ve theihte share nana hman tur ni awm z^wk tak a ni. Chuvangin, i smartphone kha inkawm nan, games khelh nan leh i thlalak, nalh tura chei belh leh share nan ringawt lo deuh, inchhiar zau nan pawh hmang thin ang che.

Tichuan, hna kan han zawm a, sorkar/corporate/private eng hnuaiah pawh ni se, kan hnathawhna organisation chu hriat chian kan tum tur a ni. Sorkar hnuai a nih chuan sorkar laipui, kan state, district leh a level hniam ber thlenga an inkhai diat chhoh dan leh inrelbawl dan te, hotu pawimawh zual hming leh an nihna chelh te, kan department kaihnawih dan hman mek te, sorkar kum thar apianga budget leh hma chhawp neih thar te, sorkarin eng lam nge a ngaih pawimawh (prioritise) dawn tih angte hi lo hriat ve zel a \angkai duh hle. Kan hnathawh dan tur leh kalphung angte hi chu luh tirhin training eng eng emaw a awm thin tho avangin hriat sa, chiang sa an ni. Hman kuma CSS hnuaia Hindi zirtirtu hna tihtawp a nih khan an hna an chhunzawm leh theih dan tur ngaihvenin an pawl hruaitute bakah, education lam hotu leh tlawmngai pawl hotu mi eng emaw zat chu Delhi lama sorkar laipui hotute hnenah intirh thlak a ni a. Chumi tum chuan an pawl hruaitu zinga mi pakhat chuan Mizoram-a Education changtu Parliamentary Secretary chu a hming leh hmel tak ngial pawh a lo la hre ngai lo, an tih tlat pek chu! Bank lama thawk tan pawh banking system leh operation te chu training neih atanga hriat theih a ni a, chumi piah lamah chuan India ram chhung chin tala market capitalization atanga chhutin eng bank hi nge lian ber, banking sector chanchin pawimawh zual leh a dinhmun ni lai mek tih angte pawh kan sawi ve thei viau zel tur a ni. Company hnuai emawa thil zuara thawk tur kan nih pawhin, kan thil zawrh tur chu a chanchin (product knowledge) kan hre bel hle tur a ni a. Company dangte aia kan \hat bikna leh danglam bikna, midangte’n an tih ve theih loh kan tih theih si tih ang zawng zawngte hi hriat vek a tha.

Hriatna hmanga inher rem thiamna

Tin, luh kan tum lai, kan thawh tirh leh a hnu lama thil kan hriat leh dan dinglai ni thinte pawh an hmantlak (relevant) reng thei bik lo a. Chuvangin, thangthar zawkte ban ve zel theih turin kan in-update chhoh ve reng a ngai. Hmana PU/BA nia sorkar zirtirtu thawk reng lai pawhin tunah chuan RTE vangin D.El.Ed/B.Ed a neih a ngai tawh a. Tunah chuan Mizoram Sorkar hnuaia group A, B leh C hna tam zawk atana lak turte leh group D atanga group C kaisanna tur hna tam zawkah chuan computer certificate neih a ngai tawh. Aizawla polythene bag zuara sumdawng reng thinte pawhin tunah chuan AMC PWM Rules 2016-in a phal chi thil khaina bag lo chu an zuar chhuak thei tawh lo a. Hmanah chuan sumdawnna atan PCO an hmang thin a, mobile phone rawn chhuah tirh khan prepaid recharge voucher-te pawh scratch card ang chi kha a ni thin; tunah chuan top-up inthunsak nan chuan phone an hmang leh vek tawh. Kum 2020 atanga India ram chhunga emission norms hman thar tur, BS-VI standard paltlang lo lirtheite pawh zawrh chhuah theih loh hun a la awm ang. Chutiang zelin, pertrol pump neitute tan pawh tuna kan lirthei hman lai, tuialhthei hmang (internal combustion engine) chite hi EV (Electronic Vehicle)-a thlak an nih tak tak hunah chuan an petrol pump-te pawh charging station-a leh a la ngai ve ngei ang le. Chuvangin, kan eizawnna leh hna chelh lai mekte hi tunlai mil tura kan her rem thiam ve zel a ngai a. Hna dang, tuna entir nana kan han tarlan ni ve lem loahte pawh hriat hnem hi thalai hman tlak leh chawr tlak nihna atan chuan a pawimawh vek tho a ni.

          

Tam ringawt a tha ber em?

Tun hnuah tam kan tum thar a. India ram mihring tam dan ngaihtuahin Mizoram mihring tlem bikzia te, a hnam anga khawvel puma kan la tlemzia te ngaihtuah chuan a awm viau mai; fa neih tam thlengin kan inzirtir a, thil tih awm tak pawh a ni e. Tam ringawt hi a \ha ber ang em?

Tam thatna nia sawi thin thil thenkhatte chu:

Hralhna tur tam, leitu tur tam bawk: Mihring kan tam miau chuan kan thil siam chhuah leh thar chhuahte hralhna tur (consumer market) pawh a tam nge nge. Economies of scale a awm dawn tihna a ni ber. Kan sum hman (consumer spending) pawh a sang zawk hle ang.

Thawktu tur tam: Mihring kan tam chuan hnathawk thei, thawh tur duh kan tam dawn a, kan indaih chuan inrawih man (labour cost) pawh a hniam nghal ang.

Hmasawnna ruhrel din a tiawlsam: Hnathawk tur an tam chuan a rualin hmasawnna ruhrel din hna (infrastructural projects) chi hrang hrang a thawh theih.

Chhiah a tipung: Mihring an tam chuan sum la lut hnem an pung a, sum lakluh mila chhiah lak, sorkar sum bawma lut tur a tam phah.

Tam that lohna ve thung

Tam a that loh chuan tlem a tha zawk tihna tluk  a ni. Tam that lohna nia sawi thinte sawi dawn chuan tlem thatna pawh sawi tel a ngai a. Chu’ngte chu:

Mi pakhat lak luh tlem: Thawktu tur an indaih rualin a thawh tur lamin a daih lo ve thung a. Hlawh phut san theih a nih loh avangin chawh ruala mi pakhat lak luh (per capita income) a tlem.

Retheihna: Retheihna tihpunna awlsam ber chu tam a ni. Vai rama kutdawh tam dan atang te hian a chiang reng mai. An BPL leh kan BPL (ziah luh)-te sorkar tehfung atang chuan kan inthlau ve khawp ang. Khawsak harsa zawkte pawh YMA branch leh kohhran khat chhunga mite chu kan la indawm kang thei deuh zel a. TV programme pakhat Samari Mitha hmang chauh pawhin kan la intanpui hnem thei viau mai.

Sorkar hmalaknain a huapzo har: Mihring tamna hmunah chuan sorkar hmalakna reng rengin a daih har bik. MLA fund leh MP fund (MPLADS) ang chite pawh hian mihring tamna bialah chuan a a daihzai mawh khawp ang.

Sorkar leiba a titam: Rethei an tam chuan a thlawna sem, tumsak leh man man zawka sem chhuah tur subsidy thil a ngai hnem a, chu chuan sorkar leiba a titam.

Faina leh hriselna a tihniam: Mihring an tam chuan natna inkai darh te a lo awlsam bik a. Chu chuan hriselna lam a hnuk hniam a, faina lamah pawh an hniam nge nge.

Fa neih tam kan inzirtir mek lai leh tam kan tum mek lai hian kan ramin thar chhuah, deh chhuah, siam chhuah leh leilung hausakna tih tham kan nei em tih te ngaihtuah hmasa ila. Income Tax te phei chu kan pek ve loh avangin kan tam vang ngawt chuan lak luh zat mila sorkara chhiah chhun luh pung tur a awm ve thei dawn bawk si lo. Khawvel hmun dangah pawh ram lian lem lo, mihring tlemna ni bawk siah pawh ei leh bar lama an intodelh phawt chuan an inchim ral mai bik lo a. Ramin hma a sawn hmasak phawt chuan mihring tlemna, Singapore-ah te pawh thawktu indaih lohna avangin kan Mizo nula eng emaw zat tiamin thawktu an inchah lut mek reng zawk a nih hi. Israel ram te reuh te pawh thiamna (technology) leh economy-ah a san phawt chuan an chim ral mai bik lo a. Ram ropui America te phei chuan an rama pemlut apiangte chu a khua leh tui tha-ah a chhuah thei deuh zel zawk a ni.           

Elon Musk hi tu nge a nih?

Microsoft-a Bill Gates leh Apple-a Steve Jobs tih te hi chu technology huang pawnah pawh ni se, khawvel puma mi hriat hlawh phak an ni a. Anni ang bawk hian tunlai hian mi’n a hming an lam rika lo hre ve lotu nih bik chi miah loh mi pakhat a awm a. A hming chu Elon Musk a ni. Elon Musk-a hi Canadian mi, South Africa-a piang, inventor leh entrepreneur ni bawk lar hmingthang tak a ni a. A tleirawl laiin Stanford University hnuaiah graduate zir turin tling tho mah se, zir lovin technology kaihnawih sumdawnna bul a tan chho ta zawk a ni.

Tuna internet-a pawisa inpekna leh inthawnna (payment system) lar ber pawl, PayPal hi ama siam chhuah a ni. Tunlaia electric car lar tak siam chhuaktu, Tesla Inc.-ah hian CEO ni mekin, an electric car siam chhuah te hi ama ngaihtuah chhuah deuh vek a ni a. An car model thar ber, Model 3 man hi cheng nuai 24 leh tih vel atangin a intan. Van thengrenga inkah chhohna (aerospace) hmanrua siam chhuah lama company lar tak, SpaceX-ah pawh hian an hotupa ber a ni bawk.  Ni zung chakna hmanga kawlphetha siam chhuah, eng chhit atan mai ni lo, building pumpui power supply atana hman theih chi siamtu, SolarCity pawh hi ama ngaihtuah chhuah tho a ni.

Tin, tuna khawvela train tlan chak ber nia an sawi, Maglev (431 km/h) ai pawha tlan chak thei tur mode of transportation thar, Hyperloop pawh hi ama ngaihtuah chhuah tho hi a ni a. Hyperloop-ah hian a kawng chu pipe lianpui, inzawm put siam a ngai dawn a. Pipe chhungah chuan bungrua emaw, mihring thahnem tawk tak emaw leng, bawm (capsule) awmin, chu capsule chu a kal pawh kal mai lovin, a thlawhin a “thlawk” puat puat tawh mai dawn a nih hmel. 560 km-a hla hi 970 km/h-a chak (top speed 1,200 km/h)-in minute 35 chhungin thleng hman thei tura beisei a ni a. Aizawl leh Guwahati inkar (488.2 km) te phei chu kan thleng hma duh ngawt ang le!

Musk-a hian computer ‘finna siamchawp’ (artificial intelligence)-in hma a sawn chhoh zel chuan nakinah chuan mihringte tan hlauhawmah a la chang mai ang tih thu a lo sawi chhuak tawh a. Hei hi Facebook siam chhuaktupa, Mark Zuckerberg-a ngaihdan nen chuan a inpersan hle thung.

Heti taka tunlai khawvel thiamna lama mi chungchuang a nih avang hian hausak pawh a hausa tawntaw hle mai a. A hausakna te chu midangte tanpui nan thahnem tawk tak a pe chhuak reng tho nachungin, sum tawktarha sorkar thuthlukna te pawh mahni duhdan anga her danglamtir theitu, lobbyist pui tak ni angin America ramah chuan sawi a lo ni ve mek bawk a. US Congress te, Democrats leh Republicans party-te tan khuan US dollar 4 million chuang a theh chhuak tawh nia hriat a ni. Amah ngei pawh hian Washington Post-in an kawm tumin, “Washington tlanga hriat hlawh ni tur chuan sum tlem azawng theh chhuah te pawh a ngai ve bawk ang chu,” a lo ti pek a ni awm asin.

Hmasawn nan Pawisa a tawk em?

Sorkar hian pawisa a duh ang zata tam siam (print) chhuak se, mipuite hnenah sem chhuak nghal mai lovin hmasawnna ruhrel din nan te, project liam tham thawh nan te, kawng chhia siam that nan te hman nghal thin zawk mai awm, tih te; retheihna um bo nan sorkar chuan a duh phawt chuan pawisa a duh zat zat a siam chhuak thei mai lo em ni, tih te hi naupan lai atang tawha rilrua zawhna lo lut thin tawh a nih theuh a rinawm.

Sorkarin pawisa a print hian a hman dan chu eng pawh lo ni se, a tawpah chuan mipuite hnenah bawk a lut leh tho tho thin. Tu sorkar mahin pawisa a print-in helicopter atangin emaw a thlak darh chiam kan hre ngai lo ang. Pawisa chuan tih dan phung pangngaiin indawrna (transactions) hmangin mipuite hnen a thleng mai thin zawk a ni.

Mi pakhat insensona chu mi dang tan sum hai luhna a lo ni thin ang hian, sorkarin kawng, building, tuikhuah, thlawhna tum hmun, zirna in, damdawi in leh thil dang siamna atana hna a theh hian chu’ng hnathawktu contractor leh construction company-te leh an hnuaia hnathawkte te tan sum hnarah a lo chang thin a. Hnathawktute chuan an sum lak luh hmang chuan an mamawh leh awh zawngte an lei a, then khatin chu’ng an sum lak luh te chu bank-ah te an dah that then laiin, a then chuan loan lain an lo lei belh zel bawk a.

Chutianga sum an va hman chhuahna lamah chuan sorkar pawisa print chhuahte chuan sumdawng leh mi in luah neitute hnen a lo thleng ve leh a. Chungho chuan an pawisa dawn chu thil chi hrang hrang atan lo hmang chhuak ve lehin, chu chuan mamawhna (demand) sang zawk a rawn hring a, mipuite mamawhna rawn pung chho zel chuan market-ah thil man a rawn tisang a. Demand sang phuhru zo tur khawp thar chhuah a nih ve loh phei chuan thil man sang vanga pawisa hlutna tla hniam, inflation a thlen phah ta thin a ni. Mipuite thar chhuah leh deh chhuah (production & supply) a san tel ve chuan si loh chuan sum neih ngah chung pawhin ram ei leh bar dinhmun a tha thei tak tak chuang lo.

Pawisa print hnem leh Inflation

Production leh supply lam pung ve mang si lova pawisa pawngpaw print chhuah hnem rikgawtin ram sum leh pai dinhmun (economy) a tihthat phah chuan lohzia hun kal tawh, history-ah pawh khan sawi tur a awm thei nual awm e. Kum 1920 chhoah khan Germany ramah pawisa print hnem lutuk avangin hyper inflation nasa tak mai a thleng a. Naupangte chuan pawisa telte chu khawlaia inkhualtelem nan te, bang chei mawi nan (wallpaper) leh lehkhachaih siam nan te an hmang vel mai mai thin. Chhangthawp tlang khat lei tur ringawt pawhin wheel barrow meuh hmanga pawisa tel tam tak nawr chhuah a ngaih thin avangin, a pawisa ber ai mahin a wheelbarrow zawk bo leh inruksak a tam zawk e, an ti alawm. Hyper inflation avang hian thil man pawh a mumal hlei thei lo a. Hnathawktu ni khat hlawh tur te pawh ni khat chhungin tum hnihte an inpe chhuak thin a. An inpek zawh rual ruala thil lei nana an hman nghal zel loh phei chuan ni khat chhung lek paw’n thil mante chu a lo inthlau hman thei thin hle. A tawpah phei chuan an economy a tluk chhiat (collapse) phah ta hial reng a.

Tunlai khawvela hetiang thil thleng (modern hyper inflation) an sawi ve ziah pakhat chu kum 2000 chho pawh khan Zimbabwe ram chu ei leh bar lamah a tla chhe hle mai a. An sorkar chuan an ziaawm phah beiseiin pawisa tlang (note) hraw pui pui, 200 million Zimbabwean Dollar note tih te a siam chhuak vel a. An pawisain a hlutna a hloh phah nasat em avangin thil man tisangtu mai chauh a ni chho a; hausak a hnekin millionaire mai pawh ni lo, quadrillionaire te tan pawh US Dollar 5 tluk bak a nih chuan si loh avangin an pawisa neih chuan chhangthawp tlang hnih bak a lei zo chuang der lo. A tawpah phei chuan an ram pawisa chu tithiin indawr nan US Dollar chauh hman a nih zui phah ta hial reng a ni. Kum 2008-a United States-a bank-ten housing loan an pek chhuah nasat luat avanga inflation lo thleng tain khawvel sum leh pai tlak chhhiatna, financial crisis a thlen chho ta te pawh kha hetiang kaihhnawih tho hi a ni.

Chuvangin, kut tling lo leh thianghlim loa sum lak luh (black money) heng - chiahpuam leh khehpuam ang te pawh hi thil man titotu mai chauh an ni a. A thlawna thil/sum sem ringawt te pawh hi ram sum leh pai dinhmun siam that nan a tawk lo a ni tih hi economics ‘dan bulpui’ ber pakhat a ni zawk mai awm mang e.

Pawisa print leh tunlai

India rama bank-te bank, central bank RBI hian Reserve Bank of India Act, 1934-in thuneihna a pek angin pawisa note Rs 10,000 thleng print theihna (right) a nei a. Pawisa fai print chungchang (design, security features etc.)-a thu tawp neitu tak tak erawh central sorkar a ni thung. Pawisa thir (coin) siam chhuah (minting) hna pawh sorkar chan tho a ni. Pawisa note mamawh dan te chu kum tinin RBI hian lo chhinchhiahin, sorkar official-te hnenah a thlen hmasa thin a. Sorkar chu pawisa print chungchanga thutlukna a siam dawn tak tak hunah meuh chuan RBI-a senior staff thurawnah a innghat leh tho thin. Tichuan, RBI chuan inflation te, ram chhung deh chhuah GDP than dan te, pawisa chhia (soiled note) a thara thlak ngai zat leh inven nana dah that (reserve stock) ngai zat turte ngaihtuah chungin pawisa note print chhuah ngai zat tur chu a bituk ta thin a ni.

Pawisa fai neih ngaih hrim hrimin ram hmasawnna a thlen thei lo tih chu thil chiang a ni ta a. Chu aia pawimawh hmasa taimakna te, deh chhuah leh thar chhuah tam hmasak te hi kan intodelh theihna tur, kan ram leh hnam dinchhuahna tur a nih tih hre nawn lehin thalai kut ke kim leh hrisel pangngai, eizawng rual tawh phawt chuan kawng hrang hrangin tan i han la thar leh sauh sauh teh ang u.

Electric car chauh?

Tun hnaia sorkar laipui thluak bur Niti Aayog-in report pakhat a tihchhhuahah chuan kum 2032 kan thlen hunah chuan ram chhunga lirthei awm zawng zawngte chu electric chauh hmang tura thlak vek tum a nih thu tarlan a ni. He report-ah hian kum 2018 ral hma ngeiin sorkarin lirtheia hman tur battery charge theih chi siam chhuahna tur plant lian tham tak din ni se tih a ni a. Tuna petrol leh diesel hmang lirthei hralhna atanga chhiah tling khawm chu heng electric car-te ‘petrol pump’ ve tur, charging stations siam nana hman tangkai ni se tih a ni bawk.

Tuialhthei (fossil fuel) leh electric hmang kawp thei, hybrid cars ang chi siam chhuaha hralh hnem a nih theih nan sorkarin car manufacturer-te tan incentive tha tak a neih mek hi March 31 khan tawpin, thla ruk dang atan pawh sei a ni mek a. He scheme-ah hian kum 2020-ah chuan hybrid car nuai 70 vel hralh chhuah hman tinzawn niin, car thenkhatah phei chuan cheng nuai 1.4 lai te incentive siam a ni. Heti chung hian nikum 2016 chhung pawh khan hybrid car hi eng tih tham hralh chhuah a ni chuang lo. Company thenkhat,  hybrid car lama hma la nasa fe fe erawh an la awm reng tho a. Tunah sorkarin a ngaih pawimawh lam thlaka electric car lam a hawi leh daih si hian he industry mite lu a tihai hle a; auto sector lam tan chuan chhiat phahna tham ni hialin an lo sawi ve mek bawk.

Hei hi a chhan chu nikum lama China-in electric car siam chhuah leh hman lama nasa lehzuala tan lak a tum thu a puan tak India-in a do letna nia ngaih theih a ni a. Tin, kum 2030 ral hma-a tuialhthei import nana senso thin a zatve laia tihhniam a tumna leh Paris climate treaty tihhlawhtlin nana boruak chhia tihchhuah tlem a tumna hmanrua pakhat niin a ngaih theih bawk.

He report, US consultancy Rocky Mountain Institute nen thawk duna Niti Aayog-in a tihchhuah tak hian kum 15 chhung daih tur plan duangin, kumin atanga tanin hun bi hlawm thum (3 phases)-ah he plan tihhlawhtlin nan hian ruahmanna a siam a. Chung zinga thenkhat te chu:

• China tih mek dan ang deuha tuialhthei hmang (conventional) motor lei tharte tan public lotteries hmanga a vannei nei chauhin registration an tih theih tur leh electric vehicle-te chu registration-ah duhsak bik te.
   
• Electric vehicle a hlawma lei a, battery inhman tawm theih leh thlak kual theih siam chhuah a, electric two- leh three-wheeler man tlawm zawk siam chhuah leh a charge-na man (tariff structure) man man zawk thei tura duan chhuah te.
   
• Kum 2025 velah chuan conventional model-te man zat nena inang tlang turin battery electric vehicle-te tan subsidy sang tawk tak siamsak.
   
• Taxi atan electric car-te hman a nih theih nan an chhiah chawi tur tihtlemsak, electric car hmang car rental (fleet operator)-te tan a leina loan interest, chhiah chawi leh car charge-na man electric bill tihhniamsak te a ni.

Lirnghing hre thei phone app

University of California, Berkeley-a researcher palite chuan lir a nghin leh nghin loh hre thei phone app thar, MyShake an siam chhuak.  He app hian kan smartphone-te chet nasat dan (vibrations) atangin lirnghing chungchang min hrilh hre (alert) thei zel a ni. App hian kan smartphone-a sensor awmte hmangin kan leilung a chet thut chuan a lo hre thei nghal zel a. App siamtu (developer)-te chuan khawvel pumhuap pawhin he app hi warning system atan pawha hman theih tur niin, mipuite eng emaw chen an lo inbuatsaih hman theih phah thin an beisei a ni.

MyShake thawh dan

Kan smart phone-ah te hian hriatna (sensor) chi khat, accelorometer an tih mai chu a awm deuh vek a. Hei hi thil che, lirthei kal leh thlawhna thlawk ang chi teh nana an hman thin a ni. Khawl, building leh thil sakhat dang dangte chet (shaking) nat lam teh nan pawh an hmang thin bawk.

Accelorometer-te hi kan chet vel dan lo chhinchhiahna activity tracker atan te, kan ke pen zat leh excercise lak dan chi dangte teh nan pawh hman thin a ni a. Fitness app lar tak Runtastic ang te pawh hi accelorometer hmang niin, awmna hmun chhinchhiahna global positioning system (GPS) app-te pawh hian an hmang vek a ni. MyShake pawh hian he accelorometer hi lir chet vel dan (seismic activity) teh nan leh chhinchhiah nan rawn hmang tangkaiin, thil che satliah leh lirnghing te hre hrang thei tura duan a ni a. A siamchhuaktute hian vawi zaa 93 vel zet a hre dik thin niin an sawi.

Tichuan, chung a thil lo chhinchhiah te chu a siamtute hnen (server)-ah a thlen nghal zel a. Tum khatah hmun khat atanga report an dawn hnem viau chuan chu mi hmunah chuan lir a nghin mek loh vek pawhin, a nghing thuai dawn tihna a ni thei ang. Lirnghinna hmun chu, khawvel khawi lai hmun pawh ni se, a thawh nat dan (magnitude) nen lam an lo hriat dik thlap thlap theih phah ta thin a ni. MyShake hian phone battery a hmang heh hran lo niin an sawi a. Thil che satliah ni lo, lirnghing chauh report thin tura duan a nih avangin seismic activity a detect chauhin a rawn nung (active) thin. I smartphone kha hmun zawl lai, dawhkan chung angah te i dahin a thawh tur angin a thawk tha thei ber ang. Khawvel khawi hmuna thleng pawh ni se, lirnghing intanna atanga kilometre 10 china 5.0 magnitude leh a aia na chinah chauh hriattirna (alert) hi a rawn siam thin.

Keini, Mizoram ang, lirnghing nasa thlen theihna hmun nia an sawi, Zone 5-a awm te phei hi chuan he app hi Android PlayStore atanga download-in kan phone-ah install ta vek phei ila chu, US Geological Survey-hoin an Earthquake Early Warning System sensor ang te kan ramah an rawn bun ve mang bawk si lo a, kan tan a tangkai thei dawn riauin a hriat.

Kei pawh hian thla hnih dawn chu ka phone-ah kan lo dah ve chhin ta a. Khawvel hmun hrang hrang lirnghingte a nat zawng leh a thlenna hmun hlat zawngte min rawn hrilh hre ve nghal ta zel mai hei :)

Aadhaar Card Pawimawhna

A hming hi ‘vai’ viau mah se, tunah chuan Aadhaar card hi neih loh theih loh a nihna chhan tlem azawng han tarlang teh ang: 

• India ram mipui zaa 92 leh kum 18 chin chunglam zaa 99 vel zette chuan Aadhaar card hi an nei ta. Pawisa tihthih (demonetisation) hnu phei hi chuan a rawn pawimawh chho lehzual a. Pawisa tihthih hma, nikum October thla vela Aadhaar-a ziah luh thar tur leh siam that tur ni tin nuai 5-6 bawr vel ni thin kha demonetisation hnu hi hi chuan ni tin nuai 7-8 bawr velah a rawn pung chho nghal.
• Provident fund dawng duh khua leh tui chuan Aadhaar card an neih a ngai tawh a. Aadhar card nei lote chu an hamthatna dawn theihte sorkarin a tihtawpsak thei ang.
• Sorkar entrance exam chi hrang hrangah pawh Aadhaar card hi neih zel a ngai tawh. Tun hnai atang khan NEET atana exam chhang turte chu Aadhaar card keng vek tura tih an ni a. Sorkar chuan examination centre-a lehkha pawimawh (documents) ken ngai ngai zat tihtlem a duh a ni awm e.
• Central university scholarship chi hrang hrang hmuh nan Aadhaar card neih ngei ngei a ngai tawh a. Tuna scholarship hmu mek zirlaite pawhin hmuh chhunzawm zel tur chuan Aadhar card an neih a ngai dawn tho tho.
• Aadhaar ID leh a number te pek luh chu man tlawm zawka buhfai, chini leh atta kan lak ang chi, subsidised foodgrains la turte tan a ngai zel tawh dawn a. Retailer (Public Distribution System shops)-te hnena subsidised foodgrains kan lak chhunzawm zel theih nan June thla ral hma ngeiin Aadhar card hi neih a, theh luh fel hman a ngai bawk ang.
• Pan card nei ve lote tan Aadhaar card hi hman theih turin sorkar chuan tunah hian bengsikin ngaihtuahna a seng mek bawk a ni awm a. Nakinah phei sorkar tan chuan a khua leh tuite hriat hran (identify) nana card hran hrang awm mek hi pakhata chhunfin mai a la finthlak zawk daih mai thei a ni.

Update (June, 2017): Supreme Court of India thuchhuak angin mobile number leh aadhaar number te hi thlun zawm (link) vek tura tih a ni a. Tin, PAN card leh aadhaar card hi link tura tih a ni leh tawh bawk.

Bungrua mai maw kan lo nih?

Internet, Google, Android, Facebook, Whatsapp tih te hi tunah chuan mimir ni tin nuna bet tel an ni pha ve ta tlat mai. Internet-a lut thin chuan Google phei chu kan hmang tel deuh ziahin a rinawm. Internet i hman/i online theihna man chu thu hran ni se, Google leh Facebook te hi khawvel pumah a thlawna hman theih an ni a. A thlawn (free)-a hmang thei tur chuan a hmangtu, nangmah kha an bungrua (product) i nih hmasak a ngai. Inchhuah nep ralah phei chuan a hmangtute min “hralh” thinna sum hmanga inla lian thei an ni lek zawk nghe nghe awm e. Tunah chuan Google tih hi company pakhat hming mai pawh ni tawh lovin, kum 2006 atang daih tawh khan Merriam-Webster leh Oxford English Dictionary-te chuan thil tih sawina verb pakhat atan an lo seng lut fel leh der tawh a. Google search engine-a thil zawng turin, “Han google teh,” a tih mai theih tlat.

An bungrua chu engtin nge min hralh thin?

Google-ho kutchhuak, Android hmang phone-a google account i siam rual rual khan an ‘bungraw zawrh’ tur atan i inziak lut zui ve nghal tihna tluk a ni. Tichuan, tu nge i nih, i kum zat, hmeichhia nge mipa i nih, i awmna hmun leh i mi mal chanchin (personal information) dang zawng zawng te kha an lo chhinchhiah thei nghal a. An ‘bungraw’ tinin phone kan hman thin dan te, eng nge kan tih thin, eng nge kan chhiar thin, khawiah nge kan kal thin, kan tuina (interest) lam, Gmail-ah eng thil nge kan type thin tih te, eng thil nge lei tuma kan zawn thin, eng nge kan lei thin tih te hi ‘computer hmangin’ an lo chhinchhiah vek zel bawk. Heng kan mi mal chanchin (personal details) te hi mi dang hnenah hralh chhuak leh ngai lo angin inchhal mah se, targeted advertising/contextual advertising atan erawh an innghahna ber a ni thung. Chutiang taka kan mi mal chanchinte an lo chhinchhiah that avang chuan, sawi dan pakhatah phei chuan Google/Facebook te hi chuan keini aiin kan kawppuite an lo hre chiang daih zawk, an ti hial reng a ni.

Tichuan, phone thaho tih kha Sap tawngin han google la, Google chuan chanchin tam tak a rawn zawn chhuahsak che bakah, phone tha ve deuh lei tuma chinchang hriat (research) hmasak tum i nih beiseiin, sumdawng eng emaw zat chuan a phek tir lamah an phone neihte an rawn pho chhuak nghal ang. Chutia an rawn inpho chhuahna (advertisement) man chu Google hian an AdWords, AdSense tih vel hmangin chu’ng company hnen atang chuan an lo la zel thin a ni. Man chawia phek tir lama an rawn inpho chhuah thinna bakah hian, an fakna link i hmeh (click/tap) apiangin advertiser-te hian fee an chawi zel thin bawk. Google leh Facebook vela fakna tih man hi fakna pangngai (traditional advertising media) te aiin a tlawmin a effective fal hle a. Chuti chung chuan Google-a thil zawngtu hi mi tluklehdingawn chuang daih kan ni ni tin thin a, chu chuan tluklehdingawn chuang fakna eng emaw tal a ken tel ve nghal zel bawk si avangin heng atanga an sum lak luh theih hi a tam hma thin hle. Advertiser-te fakna tih duh phahna leh an fakna chhawpchhuah thinna “bungrua” ang maiin keini’n a thlawna kan hman ai kha min lo “hralh” char char thung a ni ta ber a nih chu. Google 2015 annual report-a a lan dan chuan kum 2015 chhung khan $ 75 billion an lak luh atangin $ 23 billion lai an hlep thei a. Hei vang hi a ni chek ang chu, Google-a hnathawk lai (employee) thi an awm chuan an chhungte’n an thla tin hlawh chanve ang zat chu kum 10 chhung an dawng thin a, an thihsan tak an fate pawhin kum 19 an tlin hma chu thla tin cheng 66,750 (US $ 1,000) an la zel thin bawk a ni.

Update (June 23, 2017): Tunah chuan Google hian targeted advertising tih nana mi mail (gmail) a lo scan thin chu a tihtawp tawh tur thu a sawi.

Online Shopping: Inchim ralna?

E-commerce/online shopping hi India ramah kum sawm hmalam te pawh khan lo awm daih tawh mah se, Mizo nawlpuiin kan hriat lara thil kan chah ve tanna chu tun hnai kum li chho vel atang chauh hian a nih a rinawm. Tichuan, online shopping sites lianhoa an thil zawrh kan han chah tak tak chu kan ram sumdawngte hian thil an ti to uchuak thin niin mi tam takin kan ngai ta thum mai. Kan thlir dan azirin he ngaih dan hi a dikin a dik lo thei ang. He thil hi inchim ralna kawng khat te thlengin a lo ni hial thei em? I han khel dawn ang hmiang.

Anni vs. Keini

A tlangpuia lakin dawr pangngai aiin online-ah thil a tlawm zawk a. An tih tlawm theih bik thinna chhan hriat theih nan India rama e-commerce company lian ber pawl Flipkart hi entirna atan han hmang lawk ila. Myntra leh Jabong neitu, Flipkart hian sorkar kum (FY) 2015-16 chhung khan cheng vbc. 13,177 an la lut thei a. Thawktu ringawt pawh mi 30,000 chuang zet an awm. A company hi tunah hian mi dangin lei dawn ta se, a hlut zawng tur chu cheng vbc. 36,944 chuang daih a ni ang. Sum an tuak (fund raise) duh chang pawhin an tih fuh tum phei chuan cheng vbc. 6,000 chuang chuang hmantir duhtu, venture capitalist te an awm leh mai thin. Tunah pawh hian cheng vbc. 10,000 dang tuak belh an tum leh mek nghe nghe. Kum 2015-a sale runpui, Big Billion Days an siam tum khan darkar 10 chhung lekin mobile handset nuai 5 chuang an hralh hman a, a pumpui phei chuan cheng vbc. 1,334 chuang man daih an hralh.

Kum 2011 chhiarpui behchhan chuan Mizoramah mihring 10,91,014 kan awm a. Kumin FY 2016-17 atana Mizoram sorkar budget chu cheng vbc. 8,038.39 a ni.  Kum 2014-15 chhunga Mizoram sum deh chhuah zat, GSDP chu cheng vbc. 11,458 a ni a, hemi zat zaa 60 dawn chu sorkar hnathawk, mi 59,000 chuangte thawhchhuah (an hlawh leh adt.) nia chhut a ni bawk.

Mizoramah hian sumdawng (trading bikah) thawktu mi 100 nei pha an awm ang em? Thawmhnaw zuar zingah tum khata nuai 100 man la thin an awm ang em? Mizorama mobile phone dawr awm zawng zawngte hian Flipkart-in darkar 10 chhunga phone an hralh zat ang hralh ve turin engtia rei nge ngei ang? Company pakhat chauh pawhin kan state kum khat sum thawh chhuah zat aia tam mah an lak luh theih a, kan sorkarin kum khat atana sum hman tur a neih zat (budget) leh company pakhatin tum khata an sum tuak ngah theih zat te a inzah thuak thuak tawh chuan khaikhin loh tur pui hi kan lo khaikhin thin a ni thei mai ang em? Heng e-commerce company dang - Snapdeal, Amazon, eBay leh mi dang dangte kan chhiar tel phei chuan khaikhin chi ziazang kan ni lo lehzual ang.      

Eng vanga ti tlawm thei bik nge an nih?

Economics-ah chuan Economies of scale tih thumal hi an hmang lar hle a. Thil siam chhuah zat a tam hrim hrim chuan pakhat siam chhuah man a tlawm thei tihna a ni deuh mai awm e. ‘Made in China’ thil a tlawm theih thinna chhan pawh hmun dang aiin thawktu hlawh a hniam bik vang chu ni tel ve bawk mah se, he economies of scale vang tho hi a ni. Tichuan, he economics tawngkam hi online-a thil a tlawm theihna chhan pawh chu a rawn ni ve ta chiah a. Siam chhuah zat a tam chuan a man a tlawm phah a, an lak hnem pawhin man tlawm zawkin an lak theih phah a, an hralh chhawn hunah pawh man tlawm zawkin an hralh thei ta thin a ni.

Mi’n ni li chhung chauha handset nuai 5 an hralhna atang ringawt pawha cheng vbc. 1,334 an lak luh theih tawh chinah chuan, zaa 1 chauh hlep turin discount pe ta chiam pawh ni se, vbc. 13 chuang chu an la hlep pha dawn tho tho. Mizoram dawrkaite thil zawrh lei thei tur awm, prospective customers chu nau piang hlim chhiar tel pawhin mi nuai 10 chuang awrh chauh an ni. Online shopping site-te prospective customers neih zat erawh ram chhungah chauh thawn chhuak thei (nation-wide shipping) pawh ni se, a nuai za tel teh meuh an ni bik ta tlat si a. Kum 2015 khan online-a thil chahtu zat chu ram pumah mi nuai 550 vel an ni a, hei hi kan hma lawk, kum 2020-ah phei chuan nuai 1,750 an tlin chhoh theih rin a ni. Tun dinhmunah pawh a let 50-60 chuangin customer kan inngah hleih sa nghal pang tihna a nih chu.

Online shopping: Inchim ralna?

Tun hmain tlangval hawklakin vai chhang kawh an laksak mai te, vai dawr hal leh bungraw chhuhsak tih te kan lo hre tawh thin. Kan thenawm Khasi hnam chu Marwari-te’n sumdawnnain an chim ral kan ti a. Chutah, trading regulation hmangin inhung bik kan han tum viau thin tak nain, India Danpui kalh si lo chuan hnam tana him dam zan tur han duan chhuah tak chu a lo theih chiah lo pawh a ni mahna. Vai dawr awm kan ngaithei lo a, pawl thenkhat chuan vai dawr emaw vai zawmpui nei dawr emaw nia an hriat te chu an lo kharsak hmiah mai zel bawk a.

Tunah chuan hmun leh hmunah ni kher lo, ral atangin ‘ralin’ ral chah hmangin min ‘chim ral’ dawn ta zawk a ang hle. Kan khaw tualah rawn inbunin dawr rawn hawng lo mah se, Mizo leh Mizo kan inchawi kan theihna, tual chhunga sum vir vel tur kha phai lama vaiho sum bawmah kan thawn liam zawk ta zel a. Kan sumdawngte atanga sorkarin chhiah sum a lak luh theih te zawng zawng pawh kal kanin, online shopping/e-commerce ‘ralin’ chan loh khanah min chim ral chho mai ang tih a va’ hlauhawm em!

Pawisa fai awm lohna leh Eirukna

Indian Prime Minister Narendra Modi hian a thusawinaah India chu pawisa fai hman lohna ram (cashless society/economy)-ah chantir a duh thu a lo sawi fo tawh thin. Pawisa fai (cash) a awm miau loh chuan chu heng banking channel - cheque payment, online transfer, debit/credit card, mobile payment adt. - eng emaw ber hmanga indawr (transact) a ngai tawh dawn tihna a ni. Chutiang cashlesss economy-a corruption pawh a bo ve nghal theih mai dan tur entirna nen i han sawi dawn chhin teh ang:

Traffic dan bawhchhiain cheng 1,000 i chawi lo ngai ta se, tun dinhmunah hi chuan a mantu police chu cheng 200 pein i inching fel thei mahna. Tichuan, cheng 800 i hum a, police chu cheng 200-in a hlawk a, ramin cheng 1,000 a hloh thung. Pawisa fai chu awm ta miah lo se, card eng emaw berin i pawisa chawi tur chu i pek a ngai thung ang. Thamna dawngtu leh petu in nih dawn avangin jail bang zut bak hmabak in neih dawn loh avangin, chu police chuan cheque emaw debit card emaw chu a dawng duh hauh lo ang, nang pawhin i pe chhuak duh bik kher lo ang. Police tan thamna han dawn mai dan a awm miau loh avangin dan (law) chu a nih tur ang takin a keng kawh tawh zawk ngei ang. I aadhaar card emaw chu a’n scan zeuh ang a, i bank account atangin i pawisa chawi tur zat chu a lo inpaih tawh mai dawn a ni. Heti hian sorkar chuan cheng 1,000 a la lut thei ta a, eirukna pawh a awm ta lo.

Tunah sumdawng emaw professional emaw i han ngaihtuah leh chhin dawn teh ang. Cable TV operator pakhat chuan subscriber chhungkaw 2,000 a nei a, a lak man thla tin cheng 300 a nih chuan kum khatah cheng nuai 72 a la lut tihna a ni. Sorkarah erawh pawttu mi 500 chauh neia kum khatah nuai 18 chauh la lut thin anga insawiin, chhiah pawh chutiang zata chawi tur ang chauh a chhung lut thin. Nuai 54 chu a account bu-ah a ziak lut dawn miah lo tihna a ni a. A sum chheh rel, black money chu official thenkhat tham nan te, VAT cash memo tel lova rangkachak lei nan te, a leina man zat dik tak sawi lo (under valuation)-a inhmun lei nan te pawh a hmang then mahna. Pawisa fai kan hman tawh miau loh chuan cable TV monthly fee pawh digital payment eng emaw ber hmang chauhin kan pe thei tawh dawn si a. Operator tan pawh loh theih lohvin a sum lak luh dik tak zawk chu a books of account-ah a lantir a ngai tawh ang. Heti hian cashless economy-a corruption awm ve theih loh dan chu a chiang thei mai awm e.

Tufts University chuan an zir chianna “The Cost Of Cash In India” an tihchhuahah Reserve Bank of India (RBI) leh bank hrang hrangte hian pawisa fai hmanga sum inpek lo buaipuina (cash operations) atan ringawt hian kum tin cheng vaibelchhe 21,000 an seng ral thin tih thu kum 2014 khan an lo tarlang daih tawh a. Heti chung hian cashless society/economy tak hi chu kan Prime Minister ber duhthusam pawh ni se, a tak ram tak chu kan la hlat hle awm e. Khawvel pum (global payments) ngaihtuah paw’n zaa 85 vel zet chu pawisa fai hmanga indawr a la ni rih tlat a. Cashless payment rinrawla nei thei tur chuan power hnianghnar, telephone leh internet connectivity chak tha leh rintlak te hi ram chhung hmun kilkhawr ber berah pawh a awm hmasak phawt a ngai ang a, chu bakah mipui tan digital payment mode hrang hrangte hi him tawk leh hman awlsam thei ang bera chhawp chhuah theih te pawh a ngai hmasa ngei ang.

Union Budget leh Technology

February 1, 2017 khan 1924 atang tawha Acworth Committee rawtna zulzuia kum 93 chhung zet lo kalpui tawh, Railway Budget leh Union budget a hranga pharh thin chu titawpin, Finance Minister Arun Jaitley chuan Union budget leh Railway budget hmun khata chhung khawmin, Parliament House-ah Union Budget 2017-18 chu a pharh ta a. He Union Budget leh technology inkaihhhnawih dan chi hnih i han tarlang dawn teh ang:

Data Mining

Indian Parliament-a data mining tih thumal an hman hi hriat a nih zen zen loh laiin, kumin budget speech-ah erawh Finance Minister khan a rawn lam ri ve tlat mai. A sawi danin ram puma mi malte chhiah (income tax) pek  dan atanga a lan danin kum khat chhunga cheng nuai 50 chin lalut chu mi nuai 1.72 chauh an awm a, tun hnai kum nga chhung khan car erawh vaibelchhe 1.25 chuang hralh chhuah a ni thung. Heti chung hian kum 2015 chhung ringawt pawh khan mi vaibelchhe 2-te chu foreign-ah an zin thei lehlawi si bawk a. Hei hian kum khat chhunga an sum lakluh tam dan a zira income tax pe tur chinte’n an pek  ngai zatte chu an pe tha lo tih a tichiang hle awm e. Heng statistics te hi data mining hmang tangkaia an lo hriat theih te a ni.

Data mining tih chuan computer hmanga thil chinchang chi hrang hrang chhinchhiah leh lo vawn thatte hmanga  kan thil hriat duh chungchang hmuhchhuah ti ila a fiah zo ngut a nge maw.

Geo Tagging

Sorkarin ro tling thil leh hmasawnna ruhrel (capital & infrastructure assets) a siam te, a bik takin thingtlang lama Mahatma Gandhi National Rural Employment Guarantee Act (MNREGA) hmanga thil siamte chuan duhthu a sam tawk lo fo thin a. Tun atang chuan heng scheme hnuaia thil siam reng rengte chu space technology hmangin chhinchhiah (geotagged) an ni zel tawh dawn. Hetiang deuh bawk hian MHRD hmalaknain ram puma sorkar sikul awm zawng zawngte chu geotagged an lo ni tawh bawk. Hetia Global Positioning System (GPS) hmanga sorkar property-te chhin chhiah an nih zel chuan contractor duham deuhin a contract work la zo fel miah si lova thawk zo tawh anga an in-report thin ang te, sum lakchhuah nan chauha mi siamsa han kawh mai ang chi te kha a rem tawh lo ang.

GPS hmang hi chuan a coordinates hriat phawt chuan location reng reng tunlai android phone pangngai chinah chuan dik leh harsa lem lo takin a hriat kilh kelh mai theih vek tawh a ni.

Internet of Things (IoT)

Kum ruk liam ta, 2011 khan internet-in a thlunzawm khawl chi hrang hrang (12.5 billion) te chuan khawvel mihring awm zat (7 billion) chu min lo khum fel daih tawh a, kan hma lawk kum 2020-ah phei chuan heng khawl inthlunzawmte hi khawvel pumah 26-50 billion inkar vel an tlin chhoh beisei a ni. Chuti taka tam a nih si chuan, internet hmanga khawl thlunzawm theihte chu hman tangkai theih dan a awm thei ang tih ngaihtuahna atangin a hman tangkai theih dan tur hmuh chhuah a ni chho ta zel a.

Internet of Things (IoT) tih chuan ni tina kan thil hman thin thil chi hrang hrangte computer lam thiamna hmanga la inthlunzawmtir theih turte sawina a ni mai awm e. IoT kan la hman tangkai theih dan tur leh mihringte khawsak a tihawlsam theih dan tur te chu, entir nan:

I len chhuah dawnin motor chahbi ken chhuah theihnghilh dawn ta la, in i chhuahsan rual rualin i “smart door” chuan i phone-ah “Beep Beep” notification a rawn siam nghal thuai ang.

In “smart fridge” chuan a chhunga chawhmeh awm tawh lote chu  lo chhinchhiahin, i bazar dawnah thil lei ngai tur, shopping list fel tak i phone-a en theih mai turin a lo siamsak thin ang che.

“Smart city”-ah chuan i “smart car” chuan traffic jam awm leh awm loh te, kawng siam mek vanga kawng chep a awm leh awm loh te leh a hel dan tur te thlengin a kaihruai thin ang che.

Thingpui dawrah i chawl a, thingpui no i in ruah rualin i phone-ah a dang i duh leh duh loh zawhna a rawn siam ang a, i “Yes” chuan waiter-in a rawn pe leh mai dawn che a ni.

Tlawng luia lei (bridge) an dawh tharah chuan “smart cement” an tih mai an hmang a, an sensor vuah chuan an concrete chhun chhungah khi a awm em tih te, load eng zat nge a lak tih te lo chhinchiah fel thlapin, siam that (repair) a ngaih leh ngaih loh tur te a hun takah PWD hotute a hriattir zel thei tawh ang. Chu mai a la ni hleinem, lei chhuat chu chirh leh thil dang vangin a hnawng nal viau thei a, i “smart car” khan i chetsual loh nan tlan muang deuh turin a rawn thei che ang a, a thurawn che chu i zawm duh lo a nih paw’n i chetsual ai chuan amah leh amah chu a intimuang lui tawh mai dawn a ni.

Dawra thil i lei dawnin an “smart shopping bag” chhungah i polythene bag ken chu i’n thun chhawng hmasa phawt ang a, i thil leite i thun luh apiangin i phone-a shopping cart-ah lo inbelh nghal zelin, i duh tawk i lei zawh hnuah i polythene bag chu i han la chhuak ang a. An dawr kawngkhar i pelh rualin ATM-a pawisa lak chhuah hmasak pawh ngai tawh lovin,  i bank account atangin i thil leina man chu a lo in-cut tawh mai dawn a ni.

Heti hian Internet of Things (IoT) chu eng nge a nih a hriat theih tawh mai awm e. Tunah hian India sorkar laipui hmachhawp pawimawh tak tak - Aizawl pawh kan tel vena Smart Cities project leh Digital India program tih velah te pawh hian IoT hi telh a ni chho ta zel a. A hranpa ngatin IOT lam tihhmasawnna turin Internet of Things (IoT) Policy pawh duan chhuah a lo ni ta hial a ni.

Cheng 500 & 1,000 tihthih tak te kha

November 9, 2016 atanga cheng 500 leh 1,000 note India sorkarin a tihthih tak kha ram pumah cheng vaibelchhia hlir nuai 15.50 dawn a awma ngaih a ni a. Chu chu pawisa leng vel zaa 88 lai a tling.  Hemi atang hian zaa 93.5 vel, cheng vaibelchhia hlir nuai 14.50 vel chu bank-ah dah luh a ni tawh nia chhut a ni.

Khang pawisa thi ta te kha eng tin nge an tih zui tak ang le? A thar var pawh ni se pawisa chhia (soiled notes) ang thoa chhiar tur a ni ang. Pawisa chhia reng rengte hi bank-ah thleng emaw dah luh emaw a nihin Reserve Bank of India (RBI)-ah an theh lut leh thin a. RBI-ah chuan khawl pakhat, CVPS (Currency Verification & Processing System) an tih hmangin an lo endik ang a. CVPS hian pawisa te chu a chhia (soiled), la hman zui tlak, a lem (counterfeit) leh hnawl tur (rejected) ah te a lo thliar hrang thlap thin. Pawisa chhia (soiled notes) te chuan Shredding & Briquetting System an paltlang leh a ngai a. Hetah hian khawl hmangin an lo tisawm (shredded) ang a, a lema mi ang hian kut phah tiat vel zelin bial tha takin an lo sawh muk (condensed) leh ang.

Shredded and condensed in cylindrical form

Hetianga an sawngbawl zawh tawh chuan a bul hnaia thil siamna hmun (factories) hrang hrangah an thil rawh thinna-a tuah (furnace fuel) atan an sem chhuak ta thin a ni. Hei hi pawisa chhia RBI-in a sawngbawl thin dan chu a ni a. Theh thang mai lovin tangkai takin an hmang leh thin a ni.

Pawisa tih thih tak te a lem leh tak lo thliar hranna tur hian khawl lian 60 vel RBI hian a nei a. Heti chung hian ni tin darkar 12 chhung thawk ziah pawh ni se, chhiar zo vek tur chuan ni 600 chuang a ngai dawn a. Chutiang taka hna hautak a nih avang chuan RBI-a theh luh leh ngai kher loa bank-te tan lo tih ve theih dan a awm em, tih te pawh sorkar chuan a ngaihtuah a ni awm e.

Eng nge VoLTE hi?

VoLTE (vawlte/vawlt tia lam) hi Voice over LTE tihna a ni a, mobile phone hmanga inbiak pawhna chi thar a ni. Inbiak laia call drop (line in-cut) leh tawng inhriat that hleih theih loh ang chi hi a awm ve loin, aw a fiah fai tha bik em em a, HD voice bakah video call te a support bawk.

VoLTE ang deuh Voice over Internet Protocol, a lam tawi VoIP, hi chu an hman tanna a rei tawh a. LTE (4G) chauh ni lo, 2G, 3G, broadband leh internet connection eng chi pawh hmang tangkaiin inbiak nan hman theih a ni. WhatsApp call, Snapchat, Skype, Viber etc. ang chi hian VoIP technology hi an hmang a, a hmangtu internet speed chak leh chak loha innghat a nih avangin kan ram angah phei chuan hman tlak loh chang a tam bakah voice quality a tha tawk lo deuh thin.

VoLTE erawh hi chu LTE/4G technology bika innghat pumhlum tawp a nih avangin a fiahfai thain VoLTE hmang ve tho mi dang biak duhte pawh, “...is not reachable” ang chi hi a awm ve vak tawh lo a, biak pawh an sam bik. Tin, tuna kan telecommunication system hman mek angin voice network leh data network a hranpaa an awm kher a ngai ve tawh lo bawk.

India ramah chuan VoLTE hi Reliance Jio hnen atanga hmelhriat tan kan ni a. Tunah phei chuan phone company-te’n an smartphone siam chhuah tam zawk chu VoLTE hi an rawn support-tir leh deuh vek tawh. Mahse, Reliance Jio tih loh operator dang zawngin an la hman ve loh bakah, Jio kan hman ve vek kher bawk si loh avangin VoLTE hi a nih tur ang a la ni lo deuhin a hriat a. Mizoramah phei chuan tower an la ngah tawk lo avangin  an sawi ang hi a la pha lo hle.

Tichuan, kan hmabak tur nia lang ta chu 4G ringawt pawh hi India ram pum anga thlir paw’n hmangtu an la tam tawk lo a; chuti chung chuan VoLTE lamah hian mobile service provider hrang hrangte’n thawm rawn nei chhoin inelna ber pakhatah an rawn hmang chho ang a, a tawpah  phei chuan voice call hmanga kan inbiak pawhna ber a la nih hial a rinawm.

Update (June, 2017): AirTel chuan circle pahnih pathum bawr velah tunah hian VoLTE hi a enchhin ve mek a ni awm e.

INDIA vs PAKISTAN: AN INDO ANG EM?

Pakistan helten J&K-a Uri khuaa India Sipai hmun an beih avanga India Sipai 18 laiin nunna an chan phah chhan letna nia ngaih theih turin, India Sipaite chuan September 29, 2016 zanlai khan Pakistan luah chin Kashmir (Pakistan occupied Kashmir) ram chhunga helte lakah beihpui - surgical strikes an nei a. Hei hian ram pahnihte inkar boruak a titang hle.

Eng nge surgical strike chu?

Surgical strike tih chuan sipaiten tum bik te neia chet an lakna, a chhehvela thil awm - building, motor, kawngpui leh midang nunna tana pawi khawih tel miah lo emaw, a nep thei ang bera pawi dang thlen teltir tuma hma an lakna, collateral damage awm lo tur ang chi hi a ni. Tum bik te neia thlawhna hmanga bomb thlak - precision bombing (opp. carpet bombing) an tih ang chi te pawh hi surgical strike chu a ni.

Eng vangin nge Pakistan-in a phat?

Pakistan media-te chuan India sipaiten surgical strikes an nei nia sawi hi thu dik lo niin an sawi thung. Pakistan military thuchhuah chuan LoC-ah ram pahnih sipaite inkahnaah Pakistan sipai pahnih an thi a, India-in Pakistan ram chhungah surgical strike an nei lo a, hei hi thleng ni se na taka an beih let tur thu a sawi.

Pakistan hian surgical strikes kha pha lo ta se, ama ram chhung ngeiah ram dang, a hmelma kumhlun ni lehnghal India-in beihpui a va thlak tih a pawm tihna a ni ang. Chu chuan a ram mipuite a tithinrim hle dawn a. Tualchhung buaina te chhuah phahin an ram sorkar paih thlak duhna a piang ang a, sipai hotute demna pawh a ri ring hle ang. Ram dang tana pawi khawih thin, firfiakte a khawi tihna a ni bawk dawn a. Chu chuan khawvel mithmuhah Pakistan hmai a tibal hle dawn a ni. International community-in Pakistan chu dem rawnin, international relations lamah Pakistan hi a luhai phah hle bawk ang.

Nghawng engte nge a neih?

He surgical strikes neih a nih avang hian ram danga India hmun pawimawhte chu Pakistan firfiakten an beih mai a hlauhthawnawm niin an sawi. Pakistan ramri bul hnaia khaw awmte chu sawnchhuah an ni a. International border atanga km 10 huam china awmte chu sawnchhuah niin, mi nuai hnih chuang chu hmun him lamah dah an ni. Ramri vengtu, Border Security Force chuan unit zawng zawng chu International Border-ah venhimna khauh zawka kalpui turin a hriattir nghal a, post hrang hranga duty turin reserve-a awm mekte pawh a ko vek. Sipai chawlh lak pawh cancel vek a ni a, tunah hian Armed Force-ho leh Air Force-ho chu inring rengin an awm nghal.

Tin, tun thla hi Hindu-ho kutpui neih hun tur a nih avangin Pakistan firfiakten ram chhungah pawi an khawih zui mai a hlauhthawnawm avangin ram chhung venhim hna pawh tihchak lehzual a ni.

An indo phah ang em?

Indo (war) tih hian ram leh ram sipaite an indo tihna a ni a. Hel thenkhat tichimit tura, mi ram chhungah mah ni se, surgical strikes neih hi chu amah ringawt chuan act of war-a chhal theih a ni lo. Kum 2011 May thla pawh khan Abbottabad, Pakistan-a an sipai hmunpui kiang lawkah America sipaite chuan surgical strike ang chi tho, Operation Neptune Spear (Operation Geronimo tia hriat bawk) chu va neiin, Osama bin Laden an thah nghe nghe kha. Khami tum pawh khan US-in Pakistan a va run tihna a ni lo. Chuvangin, Pakistan sipai tan chuan chhan dang tha tak a tel loh chuan min rawn chhan let ngawt a rem lo. Chuti chung chuan Pakistan tan a tlawmthlak a, en lem mai mai theih a ni lo. An ram Prime Minister Nawaz Sharif chuan hemi chungchangah hian October 5-a neih turin Parliament joint session a ko a; tin, LoC-a thil thlengte chungchangah an sipai hotute’n report an pe reng bawk.

Thil pakhat chu J&K ramri hrul (Line of Control)-ah hi chuan news lama lang kher lem lo pawh hian India leh Pakistan sipaite hi silai emaw, laipui emaw hmangin an insai deuh reng tih hi hre tel bawk ila a tha awm e.

Eng vangin nge an indo rih loh ang?

India hi sipai ralthuam chakna lamah Pakistan ai chuan a chungnung zawk hle a. US, Russia, China leh Japan dawtah India hi heti lamah chuan khawvelah pangana a ni a, Pakistan chu sawmpakhatna chauh a ni. Chuti chung chuan India hi tan lam nei lo leh mi run hmasa duh lo ram a ni. Indo ta se, Pakistan hian nuclear ralthuam a neih ve tho avang leh ‘buluk’ zawka ngaih a nih avangin, Mumbai te khu nuclear bomb hmangin rawn sai ta se, mihring tam takin nunna an chan phah piah lamah, chenna khawpui chu zan khat thil thu-ah vaivut, kum 400 dawn hman tlak tawh lo tur ram chhia, tlawhpawh ngam bawk si lo-ah a chang mai dawn a. Chu chu sorkar pangngai tan chuan thlentir chi a ni nang.

Pakistan hian tunah hian a sipai 200,000 aia tam mah chu Afghanistan depa awm, Balochistan an tih ramah, Pakistan atanga inlak hran duhte nen inepin a dah mek a. Hei hi a sipai neih zat zaa 33% dawn lai a nih avangin, India nen an indo thut phei chuan sipai lamah Pakistan hi a indaih rih lo hle dawn a ni. Hei bakah hian sipai 17,500 vel chu PoK chhung - India, Pakistan leh China te inrina bawr velah Pakistan leh China insumdawn tawnna kawng, CPEC (China Pakistan Economic Corridor) venghimin an awm mek bawk. Kan hriat reng tur chu China hian LoC-ah hian hetiang interest a neih avang hian Pakistan nen chauh buaina a neih reng bik theih dawn lo va. China a kankai hun a awm ngei dawn a; Pakistan leh China-te hi India tana hmelma tangdun tur chiang sa an la ni zui.

Pakistan PM Nawaz Sharif-a leh a vua leh vangte chu sum chheprel/chhiah awl ruk chungchang, Panama Leaks an tihah tunlai hian an hmingchhe hle a. Hei ringawt pawh hi luhai tham leh chinfel hmasak ngai a tling. Tin, an chhungkua hian India ram chhungah investment eng emaw zat an siam bawk.

Indian company, Jindal group te chuan Pakistan ram chhungah power plant/steel mill an kalpui mek a, heng project-ah hian India mi 300 vel an thawk mek. Indian company pakhat chuan Lahore high court hrang hrang record-te digitise hna a thawk mek. Heng India khua leh tuite himna tur ngaihtuah hmasa lo hian India chuan indo a puang hauh lo ang.

Heng zawng zawng aia pawimawh, ram economy-a nghawng tha lo a neih tur hi beng sika ngaihtuah hmasak tham a ni bawk. DGMO Lt General Ranbir Singh-a’n press conference-a surgical strikes neih a nih thu a puan hnu lawk khan BSE Sensex chu point 500 laiin a tlahniam nghal pang.

Sawi tur tam tak awm mah se, tun atan chuan i duh tawk rih phawt mai ang.

Google Map-in traffic a hriat theih dan

 
Android phone hmang chuan Google Map (I phone app drawer-a Maps tih kha) kan nei vek ang a. Google Map-ah hian kawngpui hrang hranga traffic dinhmun a hriat theih nghal a ni. Tuna ka awm mekna atanga ka kal duhna hmun thleng turin khawi kawng ber hi nge zawh ila thlen hma theih ber ang tih te a hriat theih bawk. Kein emaw, motor-in emaw, train-in emaw kal ta ila minute eng zat nge ngai tih te pawh a hriat theih. Hei hi khawpui lian, khawi lai hmun emaw ber pan tur pawha kawngpui hrang hrang zawh tur eng emaw zat  thlan tur awmna hmunah phei chuan an hmang tangkai lehzual hle.

Heng zawng zawng hi smartphone atangin Map hian a lo hre thei thin a. Phone-a GPS/location service kan tihnun hian lirthei khalhtute phone atang khan an tlan chak zawng te, motor eng zat nge tlan mek tih te a lo hriat theih ta thin a ni. Chutianga hriat theihna tur phone hmangtu an tam tawk loh chuan Map-a area bik i en mek chu grey colour (vut buak rawng)-in a lang ang. Tin, chu mi ni-a chu mi huna chu mi kawng bik zawh nan hun eng zat nge a tlangpuia lakin a duh tihte hi hun kal tawh records atangin an chhut chhuak ve thin bawk. Maps settings-ah in (Home) leh ni tina kan vah chhuah thinna hmun (Work) te set dik sa thlap phei chuan a tangkai thin ang reng khawp mai.

Eng nge QR code hi?

QR code chu eng nge?

He thuziak column lai taka milem ang hi chu i hmu fo tawh thin ang. Hei hi QR code an tih chu a ni. QR code tih chuan Quick Response Code tihna a ni mai a. Thil chhinchhiahna matrix barcode chi khat a ni. A tirah chuan Japan ramah automotive industry-a hman atana an siam chhuah a ni a. Barcode pangngai UPC barcode an tih ai hian information a khawl hnem theih zawk avang leh khawl tan a chhiar chhung a rei loh zawk avangin tunah chuan hman berah neih a lo ni chho ta a ni.

A hmanna

QR code hi motor part number, product serial number, website address/URL, e-mail id, contact number, discount coupon  chhinchhiah nan te an hmang deuh ber. Japan rama Ishinokoe khuaah phei chuan kum 2008 atang daih tawh khan thlanlung zuartu thenkhat chuan an lo hmang tangkai der tawh. QR code an scan khan thlana an phum chanchin tlangpui te a hriat theih bakah, internet a\angin mitthi chhungte khan thlan (virtual grave site) chu an tlawh kual thei vel. Tun hnua sorkar laipuiin pawisa fai hmang loa indawrna - digital payment leh cashless transaction te a chawilar thar atang phei hi chuan khawpui liana chawhmeh zuar tam tak chuan an thil zawrhah heng QR code hi belin mobile phone kaltlanga pawisa dawn nana an hman ber pakhat a ni chho ta der mai.

A hman dan

Smartphone i neih chuan i phone kha QR code scanner a ni nghal. Playstore atangin QR code scanner/reader app eng emaw ber kha install la. A app chhung atang chuan phone camera hmangin  QR code chu i scan ang a, i lak fuh chuan code siamtute information dah ang chu i phone chuan a chhiar thiam nghal mai ang.

Tichuan, advertisement-a website address te, phone no. te leh email id ang  chi te hi chhut chawp ngai lo leh chhut sual palh awm thei miah lovin i phone-ah chuan i save thei tawh mai dawn a ni. A laia QR code ka dah hi tihchhin nan i lo hmang dawn nia.

Tech Jargons thenkhat

Jargon tih chuan tawngkam hman bik neih thin sawina a ni a. Technology lama tawngkam hman bik thenkhat te a awmzia sawifiah kan tum ang. Hetiang thil inhrilh hi ‘tih kher kherna’ lam a ni lo, a dik zawk inkawhhmuh tumna mai chauh a ni e.

Online: Eng tin emaw tala internet-a ‘luh’ hi online an ti. Connected tih nen hian a inang reng. Verb emaw adjective angin emaw a hman theih ve ve. Data/Wifi connection hmangin WhatsApp i khawih mek chuan i online tihna. I khawih loh chuan i offline tihna. Online shopping lamah chuan Xioami Redmi 3S+ phone hi a company lam chuan “offline exclusive” bik atan an zuah a. Online shopping sites ni lo, dawr pangngai, an authorised dealer-te hnen atang chauha lei theih turin an ti bik tihna a ni. 

Viral: Computer virus lam sawina a ni lo. Video, thlalak leh thuziak emaw darh chak, kar lova mi tam takin an lo en/hmuh/chhiar, lar nghal hluai sawi nana hman a ni. Hei pawh hi verb emaw adjective angin emaw a hman theih ve ve. Tun hnai mai pawh khan Vishal chungchang chu WhatsApp lamah chuan a viral nghal hle a nih kha.

Left (Leave): WhatsApp group eng emaw chhuahsan dawn ta la, “Ka left dawn,” tih chu a dik thei lo ang. Hetah hi chuan ‘left’ ti lovin ‘leave’ tih a dik ang. Ka leave a; ka chhuak tawh entir nan notification-ah ‘chhuak tawh’ tihna ‘left’ tih a lo awm mai chauh zawk a ni.

Xioami: Xioami tih hi zi-omi ti ang deuhin i lo lam ve tho ka ring. Budget phones hralh tla tak siamtu, Chinese company hming a ni a. X hi Chinese chuan “Sh” angin an lam ri daih. Chuvangin, Xioami tih chu “SHIAO me” tia i lam loh vek paw’n, “show me” ti ang deuh talin i lo lam tawh dawn nia. A ho em? Kum 2014-a India rama Chinese President Xi Jinping a lo zin tum khan, Doordarshan chanchinthar chhiartu pakhat chuan Roman numeral XI emaw tiin, "Eleven Jinping" a lo ti palh hlauh a; an ban phah daih asin! Chuvangin, a ho thei lo hrim hrim. Tin, Xioami phone thenkhat chu an hming MI tiin a intan hlawm a. Hei pawh hi abbreviation anga “M.I.” ti lovin, “me” anga lam tho tur a ni e.

Meme: Meme (film tih thluka lam tur) tih tawngkam hi social media lamah hian a lar hle a. Video, audio clip, thuziak, milem adt. an inthawn kual vak vak thin, darh chiam thin ang chi sawina a ni. A bikin fiam thu leh nuihzatthlak lampang a kawk lehzual. Tun hnaiah pawh “Tlangval vannei” meme chu a viral leh pek hle a nih kha.